أكسجين للشاعرة أسوار صور

خبّئيني في جروحك أكسجينٍ وازفريني

واقرأيني في بياضك، عطّري كل الأماكن

احمليني جثّة الدمعة الأخيره، وادفنيني

علّلي باقي غيابي، هي نهاية كل كائن

وافتحي شبّاك خصرك، وارقصي لا تدمعيني

تعلمي ما غبت لحظة، وانني فالروح ساكن

يا حبيبي طاحت دموعي فْضلعي من حنيني

انزلق فيها المسام، ولامستني آه لكن ..

ضعت مدري وين طارت بي ضحكتي يا معيني

جيت أبني للأماني فيك موطن كيف ضاعن؟

جيت بَمْلأني فْدمّك بس لقيتك وسط عيني

هو دعاء أني أشوفك في عروقي به تزامن

آه عمري كل سنين العمر تمضي بس سنيني

شيء خيالي لا شعرت العمر كله فيك كامن

شيء خيالي لا تحسّست الوريد اللي فْيميني

أشعر انفاسك بدمّي، لا ذبحني الشوق ثارن

يا وجودي ودمعة الحبّ الجميلة واكسجيني

هاك عمري، وانغمس فالروح، واسري في الأماكن