الشمس نامت في دمي للشاعرة أسوار صور

كل شي تغيّر ما بقى للعشق طاري والوله

كلٍ تلاشى من زمن، والشمس نامت في دمي

وصلك غدى وصل اللحظوظ الميته كالمهزلة

ترمي ظما غصنك علي، يصفر، يموت المرتمي

ما عدت لعيوني كحل، صدري كره هالسلسلة

لو يثمرك بُعدك طعم، لا تشتهي تلمس فمي

مثل الإجابة الواقفة ما بين كومة أسئلة

أيوا/ نعم، بضعة هلا، وشوي غلا، ما يتسمي!

ضايق على صدري الوفا حتى الهوا ما يدخله

موت العطش في داخلي، سمّم جراحي ونْسمي

كل شي تغيّر ما بقى للصلح جاره / لا هله

حتى سماي الممطرة عافت لأرضك تنتمي

حتى السنين المقبله، أحسّها مب مقبلة!

إلا إذا مات الخبر، والمبتدأ أصبح عمي

يعني كذا بالمختصر كانت حكاية مرحلة

نامت ليالي قلبها، والشمس نامت في دمي