شو بيخسر للشاعرة أسوار صور

ويعني لو ضحك لي، ثم رفع راسه وش بْيخسر؟

ما يكفي إنّه معذّبني؟ ما يكفي هالعذاب يغير

يا ريته بس يقول أحبّ عشان أردّ: وانا أكثر!

سنه وخدي ينام بْحزن يدّيني وما لي غير ..

أطالع ظلّه العابر يا رب ارحم / يا رب اغفر

يا ربي ليه دنيايه فقيرة ما يمرها طير؟؟

تحطّم زورق بقلبي، وانا أرجوه بس يعبر

على ضفة حنانه يصير كل اللي يباه يصير

شعورٍ ما لمس روحي كبر هذي السّما وأكبر

يمرّ وريح هندامه على محمل وجودي يطير

كأنّه عايش بدنياه بين الطيب والمبخر

يمرّ الحال.. يتمنّى يجفّ الماء واصير البير

عشانه بس يجي بفاسه، ويكسر وش يبي يكسر

لجل يعرف على مكثر عذابي منه ماني بخير

 ويعني لو رفع راسه، وكلمني وش بيخسر؟